Ṣẹyin naa ti gbọ ohun ti Lateef Adedimeji ṣe fawọn ẹlẹgbẹ rẹ?
Ẹsẹ ko gba ero l’Ọjọruu, Wẹsidee, ọjọ kẹẹẹdọgbọn, oṣu Kẹsan-an, ọdun 2024 nile iworan sinima nla kan ti wọn n pe ni Filmhouse Cinema, eyi to fikalẹ sinu ọgba City Mall, to wa lagbegbe Lẹkki, l’Erekuṣu Eko, pẹlu bawọn alejo pataki, awọn oloṣelu, awọn oṣere tiata, awọn ọtọkulu, titi kan awọn to n ṣe onigbọwọ fiimu ti wọn n pe ni puromota , awọn ti wọn n gbe awo orin jade, ati awọn ololufẹ gbajumọ oṣere tiata to fẹran lati ma sọrọ bi ẹya Ibo ṣe maa n fi tipatipa sọ Yoruba nni, Lateef Adedimeji, pẹlu iyawo rẹ, toun naa jẹ irawọ oṣere tiata, Adebimpe Oyebade, ti wọn n pe ni Mo Bimpe, ṣe n da gìrọ́-gìrọ́ lọọ woran sinima tuntun ti tọkọtaya naa ṣẹṣẹ gbe jade, ti wọn pe akọle rẹ ni Liṣabi – The Uprising.
Ọjọ naa ni wọn ko sinima Liṣabi jade bii ọmọ ọjọ mẹjọ, to gori igba, lori ẹrọ ayelujara, ni ikanni Netflix to ṣe agbatẹru ati alagbata rẹ.
Aṣalẹ manigbagbe kan lọjọ naa, pẹlu bi iran oriṣiiriṣii ṣe n ṣẹlẹ, bawọn eeyan naa ṣe n ki ara wọn, wọn n yọ mọ ara wọn, ti wọn n di mọ ara wọn gbagi, awọn mi-in si n fẹnu ko ara wọn lẹnu, bẹẹ ni wọn n rọ lọọ ki Adedimeji ati iyawo rẹ, wọn si n kan saara si wọn pe wọn kuu aṣeyọri, wọn ni iṣẹ nla ni wọn ṣe, pẹlu adura pe fiimu naa yoo ba ọja, yoo pawo rẹ, yoo si jẹ aṣejere fun wọn.
Bi aṣọ ṣe n pe aṣọ ran niṣẹ, bẹẹ ni imura ati iṣaraloge lọ janti-rẹrẹ, oriṣiiriṣii ẹwa ati irisi to joju-ni-gbese ati oge ṣiṣe igbalode lo ṣẹlẹ nibi afihan sinima ọjọ naa.
Aka-i-ka-tan lawọn eeyan to pesẹ, lara wọn ni awọn eekan oṣere tiata bii Ibrahim Chatta, Ọdunlade Adekọla, Fẹmi Adebayọ tawọn eeyan mọ si Jẹlili oniso, Toyin Abraham, ti wọn n pe ni Iya Ire ati ọkọ rẹ, Kọlawọle Ajeyẹmi, Ibrahim Yekinni Bakare tawọn eeyan tun mọ si Itẹlẹ, Kelvin Ikeduba, Jide Awobọna, Gabriel Afọlayan, Muyiwa Ademọla ati bẹẹ bẹẹ lọ ni wọn pesẹ sibi afihan naa.
Bi pọpọ-ṣinṣin ayẹyẹ naa ṣe n lọ lọwọ, Lateef Ademeji ṣe ohun ti ọpọ eeyan ko reti, o si ya wọn lẹnu gidi. Niṣe ni ọkunrin naa ṣadeede bọ sori pepele lati ba awọn to pesẹ sibẹ sọrọ, o fẹẹ fi imọlara rẹ han lori aṣeyọri fiimu Liṣabi ati bawọn ẹlẹgbẹ rẹ ṣe gbaruku ti i. Iyẹn kii ṣe tuntun, iru ọrọ idupẹ bẹẹ saaba maa n waye nibi ayẹyẹ sinima bii eyi.
Amọ bi Adedimeji ṣe n dupẹ lọwọ, to n wo ọtun, to n wo osi, to n kuru, to n ga lori pepele, lẹẹkan naa lo tẹriba mọlẹ, o tẹriba mọlẹ gidi ni o, diẹ lo ku ko dọbalẹ gbalaja, ko si gboju soke rara bo ṣe n fi ohun irẹlẹ patapata sọrọ, lawọn eeyan ba n ṣe kayeefi pe ewo lo tun n ṣẹlẹ yii, wọn n reti ohun to fẹẹ sọ tabi ṣe.
Lateef ni oun fẹẹ lo anfaani ọjọ naa lati tọrọ aforiji lọwọ awọn eeyan ti oun ṣẹ ni, o ni tọkan-tọkan, tinu-tinu loun fi bẹbẹ lọwọ awọn oṣere tiata ẹlẹgbẹ oun kan, atawọn ololufẹ oun to ṣee ṣe ki oun ti kọsẹ lara wọn lasiko ti wọn n ya ere Liṣabi naa lọwọ. O loun ko ni in lọkan lati ṣẹ ẹnikẹni o, oun ko si jọ ara oun loju, tori ẹ, oun fi Ọlọrun bẹ wọn, bi iru ẹni bẹẹ ba wa, ki wọn jeburẹ, ki wọn fọwọ wọnu, ki wọn si dari ji oun, oun tọrọ aforiji wọn.
Niṣe ni atẹwọ nla dun bii ara ninu gbọngan iworan naa, awọn ero naa fi iyalẹnu wọn han, wọn kan saara si Adedimeji fun ẹmi irẹlẹ to fihan yii, wọn si gba a mọra, wọn ba a ya fọto loriṣiiriṣii, wọn si dupẹ lọwọ rẹ pe Ọmọluabi tori rẹ pe gidi ni.
Fiimu agbelewo, ti wọn gbe jade lori ẹrọ ayelujara yii ni wọn fi sọ itan akọni ilẹ Yoruba kan, Liṣabi Agbongbo Akala, to lewaju ogun ati ọtẹ ti wọn gbe dide si awọn ajẹlẹ ilẹ Ọyọ ti wọn maa n wa gba iṣakọlẹ nilẹ Ẹgba ati agbegbe rẹ fun Alaafin Ọyọ laye ọjọun.
